Os deilname aan 't U.L.K.

Auch dit jaor hubbe veer weer métgedaon aan ut Uermends Leedjes Konkoer. Sjus wiej veurig jaor hubbe veer enorm genaote van de veurbereiding en natuurlik auch ut oeteindelikke optreaje.

In 2009 hubbe veer de finale net neet gehaold, mer in 2010 waor ut waal pries.

Volgens ut juryrapport waor de jury mét name te spreake euver ozze a-muzikaliteit. Samen mét de act heat dit de doorsjlaag gegeave veur de finaleplaats.

16 Jannewaarie stinge veer dus same mét APK, De Uermendse Hofzengers, Buurt Raadhuisstraat en de Jeu de Boulesklup i.o. in de finale.
De Buurt Raadhuisstraat beet ut sjpits aaf wo-nao veer dus es 2de de bühne opmochte. De zaal waor sjtief oetverkoch en os ozze eigen fans haaje un plekske aan de sjtoaontafel weite te bereiken. Aangemoedigd door deze fanatieke aanhangers van ut jéste oer hubbe veer alles gegeave wat veer in os haaje.
Hiejnao restte os niks anges es wachte. Veer keke vol sjpanning nao de optreajes van APK, De Hofzengers en de Boulesklup. Toen nao un wervelende show Prins Branco de jéste oet de sneeuwbal kwaom gespronge begos ut pas echt te kriebele. Hiejnao waor namelik de bekendmaking van de winnaar!

Alle deilnummers werde onger de zuuvere note van de hofkapel de bühne op begeleid, wo Piet de Bwoan al op os sting te wachte mét de verlossende jury-oetspraak. Es winnaar kwaom de Buurt Raadhuisstraat oet de bus, gevolgd door APK en De Hofzengers. Haaj Five deilde de 4de plek mét de mannen van de Jeu de Boulesklup. Helaas hubbe veer ut podium net neet weite te bereike mer veer maoge zeker truuk kieke op un geslaagd ULK, veer hubbe hjél veul sjpas gehad en veer houpe dat de luuj dit auch hubbe gehad biej ut kieke nao os optreaje.