Prezentaasie

Zondig 24 jannewaarie 2010 waor 't dan eindelijk zwoa-wiet: veer prezenteerde òs jeste CD! Vanaaf hauf drie waore de deure van Café de Put geöpend veur 't publiek, en veer vònge 't sjpannend... Zouwe de luuj waal kòmme? Gelökkig hauw Bas van Heel òs geheel ònverwach oppe veurpagina van de Sjakel gezat, wat natuurlijk geweldige reklaam waor... 't Waor waal aeve sjrikke, die vief köp paginagrwoat door de breevebös, mer good! Tössje hauf drie en hauf veer kaome de jeste luuj bènne, en rònd kwart veur veer waor 't tied veur de jeste ekt, namelijk 4 op 'n riej. Nao de jeste polonaise waor 't ies gebraoke en kaom de middig lekker op gang.

De zaal begoosj langzaamaan gezellig vol te raake, wie auch C.V. De Doorzètters en C.V. De Waterratte bènnekaome. 't Woort tied veur de volgende ekt, Veer Veere oet Gelaen. De jònges wiste de sjtömming d'r good in te brènge en neemes dae nog klaagde dat de Jubranco's haeje aafgezag.... Vervolges kaome auch V.V. De Steinakker en C.V. Nieuwdorp nog bènne, en waor 't ein grwoat fjes mèt De Tatermenkes en Sacha Savelberg oet Vallekeberg, dae zien bevallige 'Heidi's' Ellen en Samantha bie zich haej... 't Optraeje veel erg good in de sjmaak en de luuj bleeve mer bènnekòmme!

Nao ein optraeje van Dobbelstein kaom Drie oet Ellef nog aeve d'r tössjedoor gefits, wat zeker neet onaeve woar! Naodat Gaston vervolges mèt zien hit "Wat Chic!" de zaal tot 't kaokpunt haej opgewerremp, waor 't dan eindelijk de beurt aan òszelf òm get ten geheure te brènge... Sjpannend, mer gelökkig veele òzze klanke good bie 't publiek! Wellich dat de oardöpkes dao auch aan höbbe biegedraage... Naodat Wim en Loe de zaal mèt hun LVK-krakers nog es ff good oppe kop zatte, sjlaote de 2 Pees oet Aelse deze geweldige middig aaf. Wat höbbe veer genaote!!!

Eederein van harte bedank veur 't kòmme, en natuurlijk last but not least, Leon en Leon (Harrold), die 't zaakje op hun eige meneer aanein gekald höbbe! Mesjien dat veer dit euver enkele jaore nog 'ns euver gaon doon... Geweldig!